شاعر بے چارہ حب جاہ کامارا ہوتا ہے۔واہ ! واہ ! کے کلمات اس کے لئے ویسے ہی کام کرتے ہیں جیسے وینٹی لیٹر پر پڑے مریض کے لئے آکسیجن ۔ شاعری اور جوئے میں بھی آپ کو بڑی یگانگت نظر آئے گی۔ دونوں بالکل یکساں ہیں۔ شاعر غزل در غزل اور شعر در شعر اس لئے تخلیق کرتا جاتا ہے کہ اب داد ملے گی اب داد ملے گی بالکل ویسے ہی جیسے جواری ہر بار ا امید کے ساتھ اپنا دائو لگاتا ہے کہ اس بار تو دائو اس کے ہاتھ ضرور لگے گا۔ لیکن جیسے ہزاروں جواری اپنے لاکھوں روپئے دائو پر لگاتے ہیں اور کامیابی ملتی ہے چند قسمت والوں کو بالکل اسی طرح سیکڑوں شاعر ہزاروں غزلیں تخلیق کرتے ہیں ، مجموعے نکالتے ہیں اور کئی تو دیوان کے دیوان مرتب کر ڈالتے ہیں مگر ہائے ری قسمت ،نہ نام مل پاتا ہے نہ دام وصول ہوتے ہیں ۔
آج کل زیادہ تر شاعر اپنے ذاتی خرچ پر اپنے مجموعے شائع کرواتے ہیں۔اور پھر اپنے ذاتی خرچ پر ہی اس کا اجرا بھی کرواتے ہیں۔ اس کی ایک وجہ تو یہ ہے کہ اب اردو اکیڈمیوں کے پاس اتنا بجٹ نہیں آتا کہ وہ کثیر تعداد میں شاعروں کے مجموعے شائع کروا سکیں اور جتنا بجٹ آتا ہے وہ ایسے شاعروں اور ادیبوں کے کام آ جاتا ہے جو ذرا چالاک اور ہوشیار قسم کے ہوتے ہیں ۔ اس ہوشیاری سے ہماری کیا مراد ہے آپ سمجھ ہی گئے ہوں گے۔ بحرحال اپنے خرچ پر مجموعے چھپوانے والے شعرا اور ادیب اپنے مجموعوں کی صرف 100 یا 200 کاپی ہی چھپواتے ہیں کیونکہ انہیں معلوم ہوتا ہے کہ ان مجموعوں کی ایک بھی کاپی کوئی خریدنے کی زہمت نہیں کرے گا ۔ایک تو معاشرے سے ویسے ہی کتابیں پڑھنے کا شوق ختم ہو چلا ہے اوپر سے خرید کر پڑھنے کا تو سوال ہی پیدا نہیں ہوتا ہے۔ اس لئے یہ 100 کتابیں بھی بے چارے گھر گھر جاکر اپنے دوستوں اور احباب کو نذر کرتے ہیں تاکہ سوسائٹی کے اشرافیہ کو خبر ہو سکے کہ ہم بھی کچھ کچھ شاعر ہیں۔
مجموعوں کی طباعت اور اس کا اجرا کرانا بھی آج کل سیانے لوگوں کے لئے روزگار کے مواقع لے کر آیا ہے۔کئی تنظیموں اور پبلشرز نے مجموعوں کی طباعت اور ان کے اجرا کے لئے باقاعدہ پیکیج بنا رکھے ہیں۔ پیکیج کے تحت شاعر سے ایک متعینہ رقم لے کر اس کا مجموعہ شائع کیا جاتا ہے اور اس کے اجرا کی رسم ادا کی جاتی ہے۔ جو لوگ ذرا زیادہ رقم خرچ کرنے کی اہلیت رکھتے ہیں تو ان کے مجموعوں پر مقالے بھی پڑھوائے جاتے ہیں اور تبصرے بھی کروائے جا سکتے ہیں۔ ان ایجنسیوں کے پاس ایسے سامعین ہوتے ہیں جو معمولی رقم کے بدلے اپنی خدمت سماعت پیش کرتے ہیں۔ان لوگوں کاادب اور شاعری سے کچھ لینا دینا نہیں ہوتا ہے۔ یہ ایک طرح کے ادبی دہاڑی مزدور ہیںجن کا کام کرسیوں پر خاموشی سے بیٹھنا اور چائے ناشتہ کر لینے تک محدودہوتا ہے۔ یہ سرمایہ دارانہ نظام کا ایک روشن پہلو ہے۔ سوشل میڈیا کے ذریعہ اس طرح کی تقریبات کی تشہیر بھی کی جاتی ہے۔
آج کل شہروں میں نوکری سے سبکدوش ہو چکے افراد نے بھی تنظیمیں بنا کر اس طرح کے کار خیر کو اپنا مشن بنا لیا ہے۔ یہ لوگ سیلف ہیلپ گروپ کی طرح اس کام کو فروغ دیتے ہیں۔اس میں زیادہ ترافراد ایسے ہوتے ہیں جن کے پاس اب کرنے کے لئے کچھ نہیں ہوتا لہٰذا وہ شاعری اور ادب کرنے لگتے ہیں۔ اس طرح کی تنظیموں کا سب سے اہم اصول ہوتا ہے" سنو اور سنانے دو"۔ یا "من تُرا حاجی بگویم تو مُرا ملا بگو"یعنی میں تجھے حاجی کہتا ہوں اور تو مجھ کو ملا کہہ ۔ اس طرح کی تنظیموں کی وجہ سے گھر کی عورتوں کو بہت راحت ملی ہے۔ ساتھ ہی شاعری کا ذوق رکھنے والے نوجوان شاعروں کو بھی تقویت اوراسٹیج مل جاتا ہے ورنہ تو ہر شہر میں دو ۔دو چار۔ چار شاعروں نے مل کر اپنے اپنے گروہ اور گینگ بنا رکھے ہیں ۔ہر گروہ کا ایک سرغنہ شاعر یا ادیب ہوتا ہے جسے لوگ استاد کہتے ہیں۔ ایک گروہ کا رکن دوسرے گروہ کے رکن کو ایک آنکھ نہیں بھاتا ہے۔ یہ بھی ایک طرح کی ادبی گینگ وار کے زمرے میں آتا ہے۔یہ لوگ ایک دوسرے کو جان سے تو نہیں مارتے لیکن حتی الامکان اپنی زبان سے اپنے حریف کو زندہ بھی نہیں رہنے دیتے۔
ایسے شعرا حضرات جن کا کلام اخبارات اور رسائل کی زینت نہیں بن پاتا ہے انہوں نے دور جدید میں اپنے کلام کی طباعت کا ایک ذریعہ او ر
ڈھونڈ نکالا ہے ۔ اور وہ ہے "مشترکہ مجموعہ" کی طباعت ۔اس طرح کے مجموعے میں دس پندرہ شاعر مل کر اپنے کلام کو ایک ہی مجموعے میں شائع کر لیتے ہیں۔ یہ مالی اعتبار سے کمزور اور غریب قسم کے شعرا کے لئے ایک بہتر راستہ ہے کیونکہ اس طرح کے مجموعے کی طباعت میں خرچ ہونے والی رقم کئی غریب شاعروں کے درمیان تقسیم ہو جاتی ہے۔
شاعروں اور ادیبوں کے یہاں ایک چلن اور فروغ پا گیا ہے۔ جو ادیب ذرا چالاک اور ہوشیار قسم کے ہوتے ہیں یا جو درس و تدریس کے پیشے سے جڑے ہوتے ہیں جیسے کالج اور یونی ورسٹی کے لیکچرار اور پروفیسر وغیرہ ، وہ اپنے شاگردوں کواس کام پر لگا دیتے ہیں کہ وہ ان کی تخلیقات پر تبصرہ لکھیں یا بعض اوقا ت اپنے کلام پر خود ہی تبصرہ لکھ کر اپنے شاگردوں کے نام سے اخبارات اور ادبی رسائل میں شائع کروا دیتے ہیں۔ اس طرح ایک تیر سے دو شکار ہوتے ہیں ۔ ایک تو استاد کا نام ہو تا ہے دوسرے شاگرد کا نام بھی اخبارات اور رسائل کی زینت بن جاتا ہے۔ ویسے آپ تو جانتے ہی ہوں گے کہ اخبارات اور رسائل نکالنا کتنا مشکل کام ہے۔ اور اگراخباریا رسالہ اردو کا ہو تو پھر یہ مشکل اور بھی شدت اختیار کر جاتی ہے۔ اس کام میں سب سے بڑی رکاوٹ ہے مال و اسبا ب کی کمی۔اس کمی کو کافی حد تک آج کل کے شاعروں اور ادیبوں نے پورا کرنے کی کوشش کی ہے۔ پہلے زمانوں میں ادیبوں اور شاعروں کو اخبارات اور رسائل میں لکھنے کے بدلے رقم پیش کی جاتی تھی ۔ اب اس کا الٹا ہو گیا ہے ۔ اب ادیب اور شاعر اپنی تخلیقات کو شائع کروانے کے لئے اخبارات اور رسائل کو رقم پیش کرنے لگے ہیں۔ اس سے اخبارات اور رسائل شائع کرنے والے اداروں کو تھوڑی تقویت ملی ہے۔ آج کل اس طرح کے رسائل کی تعداد میں کافی تیزی سے اضافہ ہواہے جو تخلیق کار سے رقم لے کر اس کی تخلیقات اور اس کی ریسرچ وغیرہ کو اپنے رسالے میں شائع کرتے ہیں۔اس سہولت کا سب سے زیادہ فائدہ رسرچ اسکالر اٹھا رہے ہیں۔
اردو شاعری میں قدیم زمانے سے استاد اور شاگرد کی روایت چلی آ رہی ہے۔ ایک استاد کے ذریعہ شاعری کا علم نئی نسل کے کئی شعرا میں سینہ بہ سینہ منتقل ہوتا آیا ہے۔ شاعری کا سب سے مشکل ترین جز ہے علم عروض ۔ اسے سیکھنے کے لئے استاد کی ضرورت اور اہمیت ہر دور میں قائم رہی ہے۔لیکن جدید علمی دور میں انٹرنیٹ ہر شعبہ میں ایک بہترین استاد بن کر ابھرا ہے۔علم عروض سیکھنے کے لئے آپ انٹرینیٹ پر موجود مواد کا سہارا لے سکتے ہیں۔ اس موضوع کی سینکڑوں کتابیں، ہزاروں کی تعداد میں ویڈیوز اور ویب سائٹس آپ کی مدد کو چوبیسوں گھنٹے تیار ہیں۔ اس سے بھی بڑھ کر آپ کے شعر کا وزن اور بحر جانچنے کے لئے کئی بہترین سافٹ ویئر آن لائن موجود ہیں۔ اب علم عروض کے لئے کسی ماہر شاعر کو استاد بنانے کی قید نہیں رہی ہے۔ لیکن اس کے علاوہ ایک سبب اور ہے جس کی وجہ سے استاد کی ضرورت اب بھی اتنی ہی شدت سے محسوس کی جاتی ہے جتنی پہلے کی جاتی تھی۔اب استاد کی ضرورت مشاعرے حاصل کرنے ، اردو اکیڈمیوں تک رسائی حاصل کرنے، اکیڈمیوں میں رکن بننے ،چھوٹے موٹے سیماناروں میں مقالے پڑھنے ،اپنی کتابوں پر مقدمات لکھوانے اور اپنے شہر اور محلوں کے پروگراموں کی صدارت کرانے کے لئے پڑتی ہے۔
اس طرح کے معاملات زیادہ ترآپسی رضامندی سے طے کئے جاتے ہیں کیونکہ اس میں استاد اور شاگرددونوں کا فائدہ ہوتا ہے۔ لیکن حد تو تب ہو جاتی ہے جب کچھ شاعر کسی معتبر اور بڑے شاعر کو زبردستی اپنا استاد قرار دے دیتے ہیں اور رات دن ، صبح شام ، ہر محفل ہر گام اس بات کو حق ثابت کرنے کے لئے خود کو ان کا شاگرد قرار دیتے نہیں تھکتے۔بے چارہ استاد شاعر بارہا کہتا رہتا ہے کہ بھا ئی میرا کوئی شاگردنہیں ہے ، میں کسی کا استادنہیں ہوں۔ مگر شاگرد ہیں کہ مانتے ہی نہیں ہیں۔ وہ" استاد - استاد"نام کے کلمہ کا ورد اتنی بلند آواز میں اور اتنی کثرت کے ساتھ کرنے لگتے ہیں کہ اس زبردستی کے استاد کا دل بھی کبھی کبھی پسیج جاتا ہے اور وہ اپنے رسوخ کی بنیاد پر اپنی عنایات کے کچھ چھینٹے ان کی جانب اچھال دیتا ہے ۔ سارے شاگرد ایک دم اس جانب لپک پڑتے ہیں۔ ایک بار پھر" استاد- استاد" نام کے کلمے کا ورد ،دوگنے زور و شور سے شروع ہو جاتا ہے۔
جدید دور میں سوشل میڈیا ہر طرح کے شاعروں کے لئے ایک بڑے پلیٹ فارم کے طور پر ابھر کر سامنے آیا ہے۔ جن شاعروں کو مشاعروں کے ڈائس یا اسٹیج نصیب نہیں ہوتے ہیں وہ سوشل میڈیا پلیٹ فارم جیسے فیس بک، وہاٹس ایپ ،انسٹا گرام اور یو ٹیوب جیسے ایپ پر اپنی صلاحیتوں کا مظاہرہ کرتے رہتے ہیں۔ سوشل میڈیا پلیٹ فارم کی سب سے اہم خوبی یہ ہے کہ یہاں آپ کو اپنی صلاحیت کا مظاہرہ کرنے کے لئے کسی نام نہاداستاد کی شاگردی اختیار کرنے یا مشاعروں کے منتظمین کی چاپلوسی کرنے کی ضرورت نہیں پڑتی ہے۔ لیکن بہت سے ہوشیار لوگوں نے یہاں بھی اپنی دوکانیں کھول لی ہیں ۔ انہوں نے آف لائن کی ہی طرح آن لائن ادبی تنظیمیں بنا لی ہیں اور وہ تمام کام آن لائن کر رہے ہیں جو آف لائن کئے جاتے تھے۔ مثال کے طور پر آن لائن مشاعرے منعقد کرنا، آن لائن مجموعوں کی اشاعت کرنا ، آن لائن اجرا کروانااور ان کی تشہیر وغیرہ کرنا۔
لوگ کہتے ہیں کہ شاعروں میں حسد اور بغض بہت زیادہ پایا جاتا ہے۔ وہ کبھی بھی اپنے ساتھی شاعر کے اچھے شعر پر دل سے داد نہیں دیتے بلکہ دل ہی دل میں ان سے جلتے ہیں۔ خیر اس بات کے بارے میں تو شاعر ہی بہتر بتا سکتے ہیں۔ لیکن یہ دیکھا گیا ہے کہ عموما ایک مدت کے بعد شاعروں کے سر پر استاد شاعر بننے کا شوق سوار ہو جاتا ہے۔ وہ اپنے لئے خود ہی اچھے شاگردوں کی تلاش اور بھرتی کی مہم شروع کر دیتے ہیںتاکہ ان کی استادی کا سکہ بھی چلنے لگ جائےاور محفلوں میں ان کے اشعار پر داد و تحسین سے نوازنے والا ایک گروہ بھی تیار ہو جائے تاکہ ان کے اشعار پر جب کوئی داد نہ دے تو شاگرد ہی ان کی لاج رکھ لیں۔ اور جب شاگرد متحرک ہوں گے تو عوام کو بھی شرم آئے گی ۔ عوام کو لگے گا کہ اتنے لوگ داد دے رہے ہیں اس کا مطلب شعر اچھا ہی ہوگا لیکن ہماری ہی سمجھ میں نہ آیا ہوگا۔ اب اگر داد نہ دی تو یہ راز سب پر فاش ہو جائے گا اس لئے چلو ہم بھی واہ ! واہ !کر ہی دیتے ہیں۔ اس میں کون سے پیسے لگنے ہیں کم سے کم ایسا تو محسوس نہیں ہوگا کہ ہمیں شعر سمجھ میں نہیں آیا۔
ویسے میں نے سنا ہے کہ کچھ شاعر مشاعروں میں اپنی دھاک جمانے کے لئے اور دوسرے شاعروں کو ہوٹ کرانے کے لئے کرائے کے سامعین بھی لایا کرتھے تھے۔ یہ کرائے کے سامعین مشہور شعرا کو ہوٹ کرتے تھے اور اپنے مالک کے شعروں پر جم کر داد دیتے تھے ۔بھائی ہم نے تو نیتائوں کی سبھائوں میں کرائے کے سامعین لے جاتے سنا بھی ہے اور دیکھا بھی ہے مگر مشاعروں میں بھی اس طرح کی حرکتیں کی جاتی ہوں گی واللہ یہ ہمارے وہم و گمان میں بھی کبھی نہ آیا لیکن کیونکہ یہ بات ہمیں خود ایک جانے مانے شاعر نے بتائی تو ہمیں یقین کرنا پڑا۔ ویسے شاعر ہوں یا نیتا دونوں کا حال ایک جیسا ہی ہے ۔ ایک کو تالیوں اور نعروں کی درکار ہے دوسرے کو داد و تحسین کی ۔ اب اگر کسی شاعر کے کلام میں دم نہ ہو تو کوئی کیا کرے وہ اپنی جیب کا دم ہی دکھائے گا۔
بحرحال شاعر ہونا اور بنے رہنا آسان کام نہیں ہے ۔ اسی لئے بیشتر شعرا اس دبائو کو برداشت نہ کر پانے کے باعث شراب خانوں کا رخ کر لیتے ہیں ویسے ہی جیسے جوئے میں ہارا ہواشخص اپنا غم غلط کرنے کے لئے کرتا ہے۔ میری خداسے دعا ہے کہ اے خدا ! جو شاعر زندہ ہیں ان شاعروں کے دلوں کو چین اور سکون عطا فرما اور جو اس دار فانی سے کوچ کر گئے ہیں ان کی روحوں کو بھی تسکین عطا کر ۔ کہیں ایسا نہ ہو کہ یہ شاعر مل کر عالم برزخ میں بھی کوئی ادبی تنظیم یا انجمن قائم کرلیں اوروہاں بھی مشاعرے شروع کر دیں ۔
कोई टिप्पणी नहीं:
एक टिप्पणी भेजें